150 Jaar fees

Program

Terwyl ek hier sit en tik wonder ek of ons besef watter groot voorreg dit is dat ons kan terug kyk op 150 jaar se genade, seën en groei in ons gemeente. Maretha Maartens skryf vir ons ‘n eenman vertoning met die naam Eben-Haeser: Die Hebreeuse betekenis van “Eben-Haeser” is ‘steen van hulp.’ Dit is afgelei van die Hebreeuse woorde ‘eben’ (steen) en ‘ezer’ (hulp), wat God se hulp en ingryping in moeilike tye simboliseer.

1 Sam 7: 12 “Toe het Samuel ‘n klip geneem en dit tussen Mispa en Sen opgerig. Hy het dit Eben-Haeser genoem en gesê: “Tot hiertoe het die Here ons gehelp.”

Tot hiertoe het God Hoopstad se NG gemeente gehelp oor 150 jaar. Dat ons in 2026 kan HOOPkerk wees. Deur oorloë, ‘n rebellie, die runderpes, droogtes, vloede, tye van hartseer en groot verlies.

MAAR ons Hemelse Vader was altyd daar. Hy het ook geseën, getroos, raad en wysheid gegee en nooit sy gemeente en mense hier in Hoopstad vergeet nie. Daarom vier ons fees om dankbaar terug te kyk en uit te roep Here U is ons Eben-Haeser hier in ons gemeenskap. En ons sien met verwagting uit oor wat U nog gaan doen hier waar U, U gemeente tot stand gebring het.

Kom fees saam en wees deel van hierdie stukkie geskiedenis.

Ds Victor Cloete

Fees organiseerder